Hjem Čálalaš girjjálašvuohta

Dáin siidduin gávnnat dieđuid dan birra mii girjjálašvuohta ja sámi girjjálašvuohta lea ja maiddái girjjálašvuođa áigodagaid birra. Leat maid dieđut dáhpáhusaid birra Norgga sámi servodagas, dáža servodagas ja muđui máilmmis mat leat váikkuhan girjjálašvuođa. Girjjálašvuhtii gullá sihke čáppagirjjálašvuohta ja áššeprosa.

Eai du vuoitte vašálaččat jos fal gáhttet gollegielat.
Čálli giehta ollá guhkás.

718-26 Nieida callaDavvi-6

Giella ja girjjálašvuohta

Giella ja gulahallan leat hui nannosit oktiičadnon, ja seamma guoská gillii ja girjjálašvuhtii. Sihke njálmmálaš ja čálalaš girjjálašvuohta lea danne maid gulahallan mas girječálli dahje muitaleaddji doaibmá sáddejeaddjin, lohkki dahje guldaleaddji vuostáváldin ja teaksta dahje muitalus fas cealkámuššan.

Sihke njálmmálaš ja čálalaš gulahallamis lea teavstta biras dahje teavstta konteaksta dehálaš. Go gulahallá oahpes olbmuiguin, geaid dovdá bures, de ii leat dárbu nu ollu čilget ja vuođuštit. Muhto jus olmmoš hálešta amas olbmuiguin dahje čállá olbmuide, geaid ii dovdda nu bures, de ferte čilget ja vuođuštit. Seamma láhkai lea go lohká teavsttaid. Jus olmmoš dovdá teavstta konteavstta, de son ádde buot beliid teavsttas. Dát boahtá erenoamáš bures ovdan dajahusaid ektui. Jus ii dovdda konteavstta ja olbmo gii juigojuvvo, de sáhttá oažžut áibbas earálágan áddejumi teavsttas.

Nuppiiguin gulahaladettiin leat gielas máŋga doaimma dahje mihttomeari. Gielas sáhttá leat informatiivvalaš doaibma. Ulbmilin lea dalle diehtojuohkin, ja guovddážis lea cealkámuš dahje teavstta sisdoallu. Makkár teavsttain lea du mielas hui čielga informatiivvalaš doaibma?

Gielas sáhttá maid leat appellatiivvalaš doaibma. Dalle mii háliidat jáhkihit nuppi olbmo ja oažžut su rievdadit oainnus. Dákkár oktavuođas lea vuostáváldi dahje lohkki guovddážis. Makkár oktavuođain lea gielas čielga appellatiivvalaš doaibma?

Gulahallandilálašvuođas sáhttet maid sáddejeaddji dahje čálli dovddut ja guottut deattuhuvvot. Son háliida ovdanbuktit mo son dovdá ja vásiha máilmmi. Dákkár gielladoaimma gohčodat ekspressiivvalaš doaibman. Makkár teavsttain sáhttá dát doaibma lea dehálaš?

Gielas sáhttá maiddái leat gillii guoski doaibma, nu gohčoduvvon poehtalaš doaibma. Makkár teavsttain son dákkár doaibma lea dábáleamos?

Leat várra jo fuomášan ahte eanaš teavsttain leat máŋga gielladoaimma, iige dušše okta.