Hjem Máinnasvarianttat
Árvádus: Gávvut guorus, gopmut dievva.

Máidnasat ee. stáluid, gufihttariid, elliid, eahpáraččaid, rávggaid, čuđiid ja gopmiid birra leat dábálaččat. Máinnasfuođđut leat sullii seamma miehtá Sámi. Muhto eai buot máinnasfuođđut deattuhuvvo seammaláhkái juohke sajis. Ovdamearkka dihtii leat mearragáttis sakka eambbo muitalusat rávggaid birra go siseatnamis. Davvi-Sámis muitaluvvo čuđiid birra, Mátta-Sámis fas ruoŧŧelaččaid birra. Maiddái namahusain sáhttet leat erohusat. Nuortan muitaluvvo gufihttariid birra, oarjin ulddaid birra, mearragáttis fas genežiid birra.

Maiddái báikki biras ja luondu speadjalasto máidnasiin ja muitalusain. Mearragátti máidnasiid dáhpáhusat leat dávjá čadnon merrii. Siseatnamis leat fas meahcci ja duottar dáhpáhusbáikin. Máidnasat ja muitalusat leat rievddadallan ja ain heivehuvvon ođđa dilálašvuođaide ja birrasiidda.

Maiddái máinnasteaddji báidná máidnasa dahje muitalusa iežas muitalanvugiin, sátneválljemiiguin ja láhttagiiguin. Máidnasat ja muitalusat leatge seilon vuosttažettiin danne go leat leamaš geavahusas eaige danne go leat čohkkejuvvon girjin. Aiddo dán sivas dat eai muitaluvvo ovttaláhkái. Daid lea váttis muitit sánis sátnái, ja juohke máinnasteaddjis lea dasa lassin iežas muitalanvuohki. Olggobeali máilbmi maid váikkuha. Ealli kultuvra váldá alcces osiid eará kultuvrrain. Nu leat sámi máidnasat ja muitalusatge dahkan.

Nu muhtun máidnasiin ja muitalusain gávdnojit variánttat miehtá Sámi. Dát čájeha ahte sámi birrasiin leat muitalusat ja máidnasat eallán guhká. Gávdnojit ovdamearkka dihtii ollu máidnasat mo rieban fille guovžža. Dovddat go don dákkár máidnasiid?