Hjem Dálá girjjálašvuohta
Árvádus: Mii dat lea mii stobu deavdá, čalbmái dovdo ja lea geahppasat go lasta?

718-15 oddaseamosgirjjit

Lea go sámiid čállin girjjálašvuohta earalágán go eará álbmogiid girjjálašvuohta? Eat dáidde vuohttit sámi máinnastanárbbi dáža románain dahje noveallain? Muitalusat ja máidnasat leat leamaš ollu sámi girječálliid inspirašuvdnan ja diehtogáldun. Smiehtas mat teavsttaid mat leat du lohkanlisttas!

Máidnasat leat váikkuhan sihke prosai ja lyrihkkii. Doppe sáhtát gávdnat oahpes máinnasfuođđuid dego gufihttariid, rávggaid ja stáluid. Ovdamearkan dasa lea Kirste Paltto mánáidgirji Vilges geađgi. Maiddái teavsttat mat leat jurddašuvvon ollesolbmuide sáhttet muittuhit máidnasa nu go mat oassi noveallain Eino Guttorma Bearralat Deatnogáttis-nammasaš girjjis. Ollu girjjiin leat dáhpáhusat čadnon ođđasat áigái, muhto muitalanárbevierru báitá liikká čađa. Dát guoská ovdamearkka dihtii Kerttu Vuolaba nuoraidrománii Čeppari Čáráhus ja máinnasrománii Bárbmoáirras.

Daddjo ahte sámi prosačállit leat gal hui čeahpit vuhtiiváldit muitalanárbbi, muhto ahte leat menddo nannosit čadnon dološ máilbmái. Sii eai gieđahala áššiid mat leat áigeguovdilat dálá olbmuide. Sámi lyrihkkárat leat leamaš ollu čeahpibut ovttastit máinnastanárbevieru ja ođđa áiggi. Nu sin lyrihkka hukse máinnasteami ala, muhto duostá gieđahallat rašis ja váttes áššiid maid dálá olbmot vásihit. Leat go don dása ovtta oaivilis? Loga eambbo dán birra Harald Gaski girjjis Skriftbilder - dahje Sápmelaččat-girjjis maid Aage Solbakk lea doaimmahan.

Sámi drámatihkkárat leat viššalit burgán sámi máinnasgiissáid. Nils Gaupa Ofelaš-filbma lea šaddan dovddusin oalle viidát máilmmis.. Duogáš filbmii leat čuhtemuitalusat. Beaivváš Sámi Teáhtera teáhterbihttá Váikko čuođi stálu leages vuolgán stáluid máidnasiin.

Sámi mánáidgirječállit leat várra áŋgirepmosit geavahan máidnasiid ja muitalusaid iežaset čállosiin. Áillohažžii, Nils Aslak Valkeapää:i, ledje sámiid eamiosku ja boares muitalanárbi dehálaččat ja dát vuhtto hui čielgasit su čállosiin.

Marry Áilunieida Somby čálii vuosttaš sámegiel mánáidgirjji Ámmul ja alit oarbmealli. Duogáš dán girjái leat gufihtarmáidnasat. Eará sámi mánáidgirječállit geat leat geavahan máidnasiid leat earet eará Kirste Paltto, Rauna Paadar-Leivo ja Inger Margrethe Olsen.