Hjem Eará dáiddasuorggit
Árvádus: Mii lea dat mii isidis atná sihke niestin ja fievrun?

Máidnasat leat leamaš ja leat ain dehálaččat dán áigásaš sámi dáiddáriidda. Sii leat geavahan máidnasiid ja máinnasfuođđuid vuođđun iežaset dáidagii. Dovddus govvadáiddára Iver Jåks govain, muorračuohpastagain ja govvačullosiin oidno dát hui čielgasit.

Eará govvadáiddárat geain dáidagiin maid vuhttojit máidnasat ja máinnasfuođđut leat earret earáid Aage Gaup, Hans Ragnar Mathisen, Ingunn Utsi ja Rosemarie Huuva.

Sámi musihkkárat leat maid geavahan máidnasiid sihke lávllateavsttain ja dan sáhttá maiddái vuohttit sin šuoŋain. Áillohaš, Nils Aslak Valkeapää ja Mari Boine musihkas lea eamiosku guovddážis ja nu maiddái máidnasat ja máinnasfuođđut. Eará musihkkárat geat barget ná leat earret eará Frode Fjellheim, Inga Juuso ja Ádjagas.

Sáhttá dadjat ahte sámi dáiddárat dán láhkai leat leamaš mielde seailluheamen sámi máidnasiid ja máinnasfuođđuid iežaset dáidagiin. Ja nu leatge sámi dáiddárat oainnusin dahkan sámi máidnasiid sihke sámiide ja olggobeallái sámi servodaga.