Hjem Čáppagirjjálašvuohta

Mii lea čáppagirjjášvuohta?

718-6 lohkamin davvi-1

Čáppagirjjálašvuođa teavsttat leat hutkojuvvon čállosat. Dat leat fiktiivvalaš čállosat. Fikšuvdna mearkkaša hutkat čállosa, olbmuid, dáhpáhusaid ja áššiid. Čáppagirjjálašvuođa dovdomearka leage ahte čálus lea hutkojuvvon ja ahte dan sáhttá dulkot máŋgga láhkai.

Vaikko velá teavsttat leat hutkojuvvon, de sáhttet liikká muitalit áššiid birra mat duođaid leat dáhpáhuvvan. Go lohká čáppagirjjálašvuođa teavsttaid, de ráhkada olmmoš iežas miellagovaid.

Girječálli geavaha máŋggalágan váikkuhangaskaomiid teavstta čáledettiin mat galget veahkehit lohkki govahallama, geasuhit lohkki ja giktalit su lohkat viidásabbot. Dát sáhttet leat gielalaš váikkuhangaskaoamit dego giellagovat, sátneválljemat ja giellageavaheapmi.

Oaidninsaji válljen lea nubbi eará váikkuhangaskaoapmi. Dát guoská dasa gean čalmmiiguin oaidná dáhpáhusaid ja jurdagiid. Dát lea erenoamáš dehálaš epihkalaš teavsttain. Komposišuvdna dahje dat mo hukse teavstta lea goalmmát eará váikkuhangaskaoapmi. Čálli sáhttá čállosa bidjat oktii iešguđet láhkai. Son sáhttá ovdamearkka dihtii romána álggus ovdanbuktit váldopersovnna ja su lagamuččaid, govvet luonddu, čilget muhtun dáhpáhusa duogáža dahje fievrridit lohkki njuolgga dáhpáhussii.

Mii lea sámi čáppagirjjálašvuohta?

Mo dii čilgešeiddet mii sámi čáppagirjjálašvuohta lea? Leago buot maid sápmelaš čáppagirjjálašvuođa girječálli čállá sámi čáppagirjjálašvuohta? Leago doaba čadnon dasa man gillii teaksta lea čállon vai teavstta sisdollui? Isket maid geat besset miellahttun Sámi girječálliid searvái, ja leat go searvvis álo leamaš dát seamma gáibádusat miellahttovuhtii.

718-31 Sámegielgirjjit  

Čappagirjjálašvuođa doaimmat

Čáppagirjjálašvuohta galgá guoimmuhit lohkki. Čáppagirjjálašvuohta sáhttá čuohcit garrasit lohkki dovdduide. Dat sáhttá illudahttit dahje njuorasmahttit nu ahte čálus čaimmaha, čieruha dahje čálus sáhttá maid suhttadit lohkki.

Čáppagirjjálašvuođa čálus sáhttá maid oahpahit lohkki.

Dat galgá min oažžut dovdat min iežamet dahje eará olbmuid jurdagiid ja vásáhusaid muhto maiddái máilmmi mii min birastahttá. Čáppagirjjálašvuohta sáhttá cuiggodit servodaga ja váikkuhit min guottuide. Čáppagirjjálašvuohta gieđahallá dovdduide guoski áššiid, olbmuid gaskasaš áššiid dahje niehkomáilmmiid áššiid, mat sulastahttet min dili.

Sámi girjjálašvuođa dutki, Harald Gaski, čállá ... nu gárvvis girdilit girjjis ná dan birra mii girjjálašvuohta lea:

- dat oahpásmahttá lohkki našunála dovdduiguin

- dat lea servodaga speajal

- dat oahpásmahttá earáid sámi jurddašeapmái

Maid son dutki oaivvilda dainna? Leago dus ovdamearka mo girjjálašvuohta oahpásmahttá lohkki našunála dovdduiguin? Man láhkai lea girjjálašvuohta servodaga speajal? Orru go du mielas čáppagirjjálašvuohta dehálaš vai leatgo dušše duššiságat ja áigegollu? Vuođuš iežat oaivila.